Soubou fr infos malbouf.

Malbouf?

Kan nou wa dann radyo télé i vé sanz nout manyèr manzé, san lo mo manzé bouzé! La pa prann dé zénérasyon po intoksik anou sanm la bouf bonmarsé i sort déor. Arlar zordi i vé sanzé, konmsi i koné pa kan zot ki lé plin! Po ékik fodré déza ké bann komèrs i arètsèrv sak lé bon marsé é de mové kalité in pwin sé tou! dann so péi sak i di ké domoun lé libr asté ou pa, sa sé bann sak na larzan, po lo ti maléré na pwin tro mwayin lo plisouvandéfwa li lé oblizé asté po pa krèv la fin.

Kisa i angrès zot pos si lo do bann maléré? La pa bézwin alé rod lwin, dann so sosyété magouyaz fodré pa oubliyé sat i rann anou malad sanm manzé gaté sé zot minm i fabrik lo médikaman! Antouléka sak i rapèl anou, sé i fo fé spor po fé désann mové grès. Nout monn lé polyé kiswa si koté la bouf, kiswa si koté la natir, lo planèt li minm lé malad.

Soubou Georges.

Kongré koté kopenag.

Résofman la planèt!

Dopi lontan banna lé antrinn ésèy rouv lo zyé, si so nafèr la tèr i résof. Dann so nafèr fo pa èt défétis, nou é banna i koné byin ké na pwin vréman solisyon. Bann gran nasyon i di swadizan wa fé in zès si bann poursantaz, makotri zot i anvoy dann nout latmosfèr, mé tout domoun i koné trébyin ké lé kaziman inposib, war min pa posib. Domoun si la tèr i ogmant, fo byin nouri azot, loto kamyon, lotrin, fo byin trouv karbiran po fé tourné?

De tout fason wa trouv in manyèr po taz la gèl domoun an boté. Zordi so nafèr i konsèrn nout tout, mé osi bann gran péi konm la Sine, Lamérik, é Lérop. Mé sak i fo pa oubliyé sé ké, bann ti péi, malgré lo ténaz bann gro i fé si zot, in zour ou lot fodra byin ké zot i avans, dann lo dévlopman zot péi. Malgré ké bann gro i kapay tout, sora sakinn zot tour. Ousa so bann salté la wa alé, po linstan zot la pokor trouv mwayin po alé koloniz bann plantèt, si néna a kolonizé!

Dann tout fason noulé dann malizé sanm bann péi ou sé plito lo kapitalis lé an drwa, pèrsonn i bouz pa, lo ti wa touzour kozé po riyn. La sann tout bann zafèr i spas, dann nout péi sé vréman prann anou po kouyon, la pi la plas po loto roulé! i inport minm, i mèt bann tax sé touzour lo ti giny si lo dwa....! So kongré la lé po ésèy fé prann konsyans bann domoun, ké o finfon zot minm na riyn afout, nou wa tousa dann nout péi toulézour.....

Soubou Georges.