Lo nimérik èk SARKOZY!

Ankourazman SARKOZY!

Lo vizit Nicolas Sarkozy prézidan la répiblik la soulèv in takon polémik, sirtou dann pèryod zéléksyon, bref... falé atann, navé po tout domoun sak té pour é sak té kont! Antouléka na in takon promès té fé konm dabitid é la konm toultan po èt tenu sra la lo vré problinm.

Si lo takon pwin na inn lé asé intérésan sé lo nimérik, lo prézidan lé dakor po èd bann zantropriz i sava invèsti dann lo nimérik, na in takon boug politik fine koz ladsi, é lo solisyon la zamé été trouvé, lo nimérik lé sèr malgré bann zèd léta é lo défigiraz nout péizay.

Alor ké bann péi déor lé a 100 méga, i si nou rame po awar seres 3giga, touzour antrinn taz anou la gèl sanm bann débit lé pa kapab zéré é mantèr, lo fibr optik, la plipar lotan an coaxial, lo mové kalité bann lign téléfon, tazaz la gèl bann nouvo provider, é sak lé la osi dopi lontan. Touzour vann bann klian nafèr lé pa posib awar, apréla i trouv pi azot.

Ské kréolèr i di fodré in zour sa i arèt si inn ti sirfas konmsala i ariv pa donn in sèrvis ké dann péi pa dévlopé bann lé kapab. ské mi di malgré bann zèt lo gran anprin, sé pa nou i sava anprofité, mé byin bann zantropriz i sort andéor, é bann gro kapitalis nana isi. Tout fason larzan i sava touzour déor, sanm tousa larzan i rant dann lo péi, nou lé ankor po domann souplé.

Georges Soubou

Kongré koté kopenag.

Résofman la planèt!

Dopi lontan banna lé antrinn ésèy rouv lo zyé, si so nafèr la tèr i résof. Dann so nafèr fo pa èt défétis, nou é banna i koné byin ké na pwin vréman solisyon. Bann gran nasyon i di swadizan wa fé in zès si bann poursantaz, makotri zot i anvoy dann nout latmosfèr, mé tout domoun i koné trébyin ké lé kaziman inposib, war min pa posib. Domoun si la tèr i ogmant, fo byin nouri azot, loto kamyon, lotrin, fo byin trouv karbiran po fé tourné?

De tout fason wa trouv in manyèr po taz la gèl domoun an boté. Zordi so nafèr i konsèrn nout tout, mé osi bann gran péi konm la Sine, Lamérik, é Lérop. Mé sak i fo pa oubliyé sé ké, bann ti péi, malgré lo ténaz bann gro i fé si zot, in zour ou lot fodra byin ké zot i avans, dann lo dévlopman zot péi. Malgré ké bann gro i kapay tout, sora sakinn zot tour. Ousa so bann salté la wa alé, po linstan zot la pokor trouv mwayin po alé koloniz bann plantèt, si néna a kolonizé!

Dann tout fason noulé dann malizé sanm bann péi ou sé plito lo kapitalis lé an drwa, pèrsonn i bouz pa, lo ti wa touzour kozé po riyn. La sann tout bann zafèr i spas, dann nout péi sé vréman prann anou po kouyon, la pi la plas po loto roulé! i inport minm, i mèt bann tax sé touzour lo ti giny si lo dwa....! So kongré la lé po ésèy fé prann konsyans bann domoun, ké o finfon zot minm na riyn afout, nou wa tousa dann nout péi toulézour.....

Soubou Georges.