Kongré koté kopenag.

Résofman la planèt!

Dopi lontan banna lé antrinn ésèy rouv lo zyé, si so nafèr la tèr i résof. Dann so nafèr fo pa èt défétis, nou é banna i koné byin ké na pwin vréman solisyon. Bann gran nasyon i di swadizan wa fé in zès si bann poursantaz, makotri zot i anvoy dann nout latmosfèr, mé tout domoun i koné trébyin ké lé kaziman inposib, war min pa posib. Domoun si la tèr i ogmant, fo byin nouri azot, loto kamyon, lotrin, fo byin trouv karbiran po fé tourné?

De tout fason wa trouv in manyèr po taz la gèl domoun an boté. Zordi so nafèr i konsèrn nout tout, mé osi bann gran péi konm la Sine, Lamérik, é Lérop. Mé sak i fo pa oubliyé sé ké, bann ti péi, malgré lo ténaz bann gro i fé si zot, in zour ou lot fodra byin ké zot i avans, dann lo dévlopman zot péi. Malgré ké bann gro i kapay tout, sora sakinn zot tour. Ousa so bann salté la wa alé, po linstan zot la pokor trouv mwayin po alé koloniz bann plantèt, si néna a kolonizé!

Dann tout fason noulé dann malizé sanm bann péi ou sé plito lo kapitalis lé an drwa, pèrsonn i bouz pa, lo ti wa touzour kozé po riyn. La sann tout bann zafèr i spas, dann nout péi sé vréman prann anou po kouyon, la pi la plas po loto roulé! i inport minm, i mèt bann tax sé touzour lo ti giny si lo dwa....! So kongré la lé po ésèy fé prann konsyans bann domoun, ké o finfon zot minm na riyn afout, nou wa tousa dann nout péi toulézour.....

Soubou Georges.

Koud fwèt.

I tap pa marmay!

Kisa na pwin tro lotan desa la pa giny kout fwèt sinon in klak sanm son paran? Komn mi di i tap pa in marmay, pars lo kor inn ti moun lé pa parèy in granmoun. Dann péi la Frans na si tèlman de lwa ké latéfé, in takon larzan laté zété, la pa aranz gransoz.

Si zordi zour bann paran i giny pi réprimand zot zanfan la lé grav, so bann boug i fé la politik i devré réflési é rogard koman na délinkans dann lo péi, dopi zot la komans fé ninport kwé, lo bann lwa i di i fo pa tap out bann marmay sa sé in nafèr i fo réspèkté, mé i di osi ou lé résponsab si zot i fé in bétiz, i di ké ou okip pa! Si ou kri inpé tro la lwa i mèl, i di aou angro fèrm out gèl é réspèk!

Mé bann marmay la i pous tor i sava volé, i sava kas loto domoun, é banna i di ké ou sé in mové paran out marmay la parti volé, domoun la tiyé ali sé out fot, mé sak zot i di pa la touzout défann aou po vréman okipé, pars si ou kri sé ou lé an tor! Atro voulwar protézé olyé édiké lo bann moun i pous tor, i tap pa in marmay, mé fo fé komprann ali sak lé bon, sé pa inn ti lasistansosyal ou in ziz i koné out zanfan! ou la fé ali, ou wa ali grandi si ou rouv byin lo zyé ou wa son bezwin.

Kan banna na 18 an, ou trouv pi lasistans sosyal, lapi larzan po ginyé sé pi zot travay, arla sépa ou lé dann la mèrd pèrson i konépi azot. Mé la vi i kontinyé vik sé bann minm pèrsonn sora la po perpétyé zot koméraz, pars kan lo marmay sora adilt li wa fé zanfan, la sinn i kontinyé. Nout péi konm banna i di sé in péi na son spésifisité, kan i aranz, ésèy fé aplik in zafèr ké i koné sera in katastrof.

Angro sé format bann moun po nir konm robo, tout fason dann so péi la ou na pi lo drwa, si riyn, pétèt si ou na larzan? la mi lès azot médité si bann parol la!

Georges Soubou