lundi 15 février 2010

Nou lé kouyon kwé?

Sosiyété tazèr lagèl nou lé fatigé!

Na in dalon a mwin i dizé tout sak la pa bon po péi déor i anvoy isi dann nput péi, sa mwin té i koné dopi lontan.

Mé sak lé grav sé an zourné nou lé basiné par la kouyonis é la napwin in kouyon po lèv lo ti dwa! Bann lwa lé voté, lé intèrdi arnaké, mé kosa ou vé sou lo zyé bann désidèr na mésaz la kouyonis i pas an zourné. In nafèr i sok sé ké domoune la pèr sorsyé, mé dann télé banna i propoz a ou konèt out lavnir par sms. Konmsi domouné lé kouyon ( wa di amwin na in takon i tonm dann panyé) alor la banna i anons ké zot lé kapab war si in tantine ou sinonsa in ga lé bon é ké ou pé fé out vnir ansanm!!! Erèzman la kouyonis i tyé pa, sinon nana bonpé té fine kas kiyèr.

Avan démarsèr té pas la min dann la tèt marmay po taz lo paran, koméla i pas par la télé po asèv rann domoun pli kouyon. Mwin mi apèl sa piblisité mansonzèr la, la lwa i pas dési. So bann sosyété la lé protézé par bann pouwar, i basine a nou sanm tout sort kalité la kouyonis

Dann so péi ousa lé an sarèt saviré kosa ou vé fé? Si nou lé kouyon, banna i fé lo kouyon!

Georges Soubou.


Aucun commentaire:

Enregistrer un commentaire