Partenaires politiques ??? Dalonaz, politikaz!!

Politique à la Réunion? politikèr zouèr ti kaz!??

La politik dann péi la lé tré intérésan, par rapor bann péy zéropéin é minm dot nasyon, isi sépa si fo krwa ankor kan banna i koz?

Nou romark ké na in promyé tour é in dézyinm lé normal ziska la! Lo bann konba zonm èk fanm ifé la politik lé o minm domi dézané, giny la plas giny larzan, é anvoy zot bann zéléktèr syé. Mé dann tout péi sakinn, sak parti i sobat po son parti. Isi eské na ankor parti politik, pars dopilèr, na in takon i koné pa kan zot K... lé plin, in kou lé a drwat in kou lé a gos é in not kou lé o milyé. Isi i koné riynk fé kamarad dot parti, ét donn la voi a zot ladvèrsèr.

Kan nou wa dann sèrtin rényon i fé la i kraz, i trèt tout sort kalité lo non, mé aprè lo né lé bouré (dann K) ansanm, sé a krwa ké zot la swaf pouwar, giny larzan é anvoy bann domoun syé.

La politik isi lé konm Kanal sanm Parabol, banna i rodifiz aou zot program konm an boukl, prann aou po in kouyon. Si ou la krévé so sora out bann zanfan wa prann la rolèv. Mé malérèzman koméla po zot lé difisil donn tol sanm siman ou taz la gèl, sanm bouraz lo krane. Epila nout bann marmay i lèv lé pa kouyon.... Tro kozé la pa bon la swit apré...

Georges Soubou

Lo zour konm la nwit!

Lo zour konm la nwit!

A byin rogardé sèrtin swadizan zaktèr kiltirèl, Larényon i vé touzour fé krwa a nou la nwit po lo zour, arla sépa zordi mi giny dann mon bwat mèl, inn ti mo po sak la giny sibvansyon po sak lé imatèryèl, in takon minm plis kifo.

Bon talèr wa di mwin lé zalou akozsa zot i ansèrv larzan bann kontribialb po zot ti biznès, konm sé po in nafèr lé imatèryèl, lé sir ni wa arpa kosa i sava fé, dopi dézané bann komik la i giny bonpé larzan po fé bann trin po la kiltir, mé mwin pèrsonèlman mwin zamé vréman vi! Mi antan i di la fé mé war minm dir dir.

Bon konm lo Maloya laté rokoni, lésir sakinn i romèt azot a friyé po war si i giny pa kapar inpé. Mwin la min lir si intèrnèt ké nana na léspwar ké si NRJ i pas Maloya, mé sak zot la pa konpri ké sak radyo na son forma, di mwin NRJ i rèspèk. Po la plipar bann radyo asosyatif sé plito la konkirans antrozot, é sa sanm bann kontra lasarité, kan ou antan bann zingl lé pa anrapor san lo tinm i pas, mi domann amwin si zot i koné kosa zot trann fé.

Mwin antan ansyin animatèr la radyo, sépakoman mo sévé i drès si mon tèt, kan nou wa sèrtin koman i koz si la radyo, lé sépa fout kapab prézant in morso lamizik san kors lo titr lé dir. Sa lé pa zot fot kan i di azot mèt la kord lé pa oblizé.

Dann lo sid Larényon ou na sèrtin radyo, mi domann amwin si bann boug i travay dési lé pa fini mor sé zot lam ou lordinatèt i tourn. Dann in not kozman mi koz si pousèr bouton, in travay plis dévalorizan po in boug, prézant sak matin lo minm zafèr, konm banna i di in radyo san fil.

Lo CSA i rouv pa lozyé ladsi, okilé lo réspé bann kayé dé sarz, sak i di i fo fé, sak i fé swadizan la kiltir, okilé bann progranm kiltirèl? Sé pa pars i koz an kréol si in radyo, ké lé forséman kiltirèl, argar in kou bann radyo komèrsyal, bonpé i koz kréol, zis po giny zoditèr, zot na riyn a fout aparaman

Pwin tro lontan nou sava pas an nimérik, la nou wa sèrtin radyo, i komans di ké lé pa sir zot wa ariv ténir lé débout, tout fason po la kalité lo bann program zot i fé sora pa in pèrt. So gasi la noré pa été si zot té i atann pa boudin kwi dann vant koson. Si ou koz konm in kanar alor kan sora nimérik, sar pir, san trèman lo son ki kout asé sèr, bon na koz inpé plis pli tar la mwin trann soul azot.... Bo mi arèt pars mwin té sa koz èkzot in boug bann té sava amar ali é bèz ali kout sabouk po in trin fanm...

Georges Soubou.