jeudi 17 décembre 2009

Volèr, mantèr

Nou lé kouyon kwé?

Eski fo ankor krwa sak nou wa ou sinonsa sak nou antan? Nou viv dann in sosyété, ousa lonèté sanm la vérité i lès a déziré. Partou domoun i ramas mantèr, a vré dir si nou rogard byin nou minm ni dévyin mantèr. Dann tan lontan i dizé ké inn ti mansonz té pa in pésé! Mé konm zot i koné napwin ti mansonz, na pwin ti pésé. Tazèr volèr nou nana an pagay, kiswa zomn dann la politik, komèrs, nou minm minm!

Nou lé formé mi diré par bann volèr, sanm in formasyon volèr, ou lé sir giny travay, é ansort aou, Arla inn ti list bann tazèr la gèl, ou bann volèr, la list lé pa EXAUSTIVE konm banna i di. Ou na lo politik, li lé normal dopi lo tan i ramas mantèr domoun i krwa pi. Ou na sèrtin komèrs, sak i fé fo piblisité po giny fourg aou bann marsandiz i vo ryin, ou swa i fé promosyon i mèt bann fo pri, kodbar lé pa bon é la i vol aou, pars mi pans sé pa in oubli, sé sinpléman po volé, mi pans pa zot i fé zérèr dann kontabilité komsala?

Apréla ou na inndé ti roké lé sirtou dann lantré bann grann sirfas, ou byin i déplas azot out kaz po tazé, vann nafèr zot lé pa kapab fourni, é osi prann domoun po zot kouyon. Po banna lé grav pars sé zot patron i domann azot de ridikiliz azot vann la fimé la plipar lotan. Totos! inn dé pli gros kouyonis ké lé tèlman gro sé bann vandèr téléfoni sanm intèrnèt, a banna sépa si zot i koné ské zot lé antrinn kozé? Lé vré i fo vann mé di pa sak ou lé pa kapab doné, na inn la minm di amwin ké si mwin na in problinm zot i vyin zot i sanz minm lo kab franstélékon,, in zour aforstan i riskab zot i giny koud fizi dovan la port domoun.

Tèlman mantèr, ké sa la fine détin si zot lantropriz, kan i koné pa bin i fé romont pli o , i fé romont dann lo sélil ekpèrtiz, é pandan so tan kabri i manz salad! E i kontinyé ramas mantèr. Kan napwin solisyon fo di kan i koné pa osi. A mon avi la di fini lo tan piston, mé sé sinpléman in mo, vi linkapasité néna po trèt in zafèr dan bann zantropriz isi ( kan nou di isi la plipar banna lé andéor, i koné minm pa kozé i apèl ou ninport kèl èr. Si na po di na di sa lé pa in problinm.

Antouléka sanm tout so bann tazèr lagèl nou nana isi, é sak lé andéor, na pwin ryin la polisyon CO2 mé osi la polisyon mantèr volèr é sa fodré fé osi in kongré.

Georges SOUBOU

Aucun commentaire:

Enregistrer un commentaire