Koud fwèt.

I tap pa marmay!

Kisa na pwin tro lotan desa la pa giny kout fwèt sinon in klak sanm son paran? Komn mi di i tap pa in marmay, pars lo kor inn ti moun lé pa parèy in granmoun. Dann péi la Frans na si tèlman de lwa ké latéfé, in takon larzan laté zété, la pa aranz gransoz.

Si zordi zour bann paran i giny pi réprimand zot zanfan la lé grav, so bann boug i fé la politik i devré réflési é rogard koman na délinkans dann lo péi, dopi zot la komans fé ninport kwé, lo bann lwa i di i fo pa tap out bann marmay sa sé in nafèr i fo réspèkté, mé i di osi ou lé résponsab si zot i fé in bétiz, i di ké ou okip pa! Si ou kri inpé tro la lwa i mèl, i di aou angro fèrm out gèl é réspèk!

Mé bann marmay la i pous tor i sava volé, i sava kas loto domoun, é banna i di ké ou sé in mové paran out marmay la parti volé, domoun la tiyé ali sé out fot, mé sak zot i di pa la touzout défann aou po vréman okipé, pars si ou kri sé ou lé an tor! Atro voulwar protézé olyé édiké lo bann moun i pous tor, i tap pa in marmay, mé fo fé komprann ali sak lé bon, sé pa inn ti lasistansosyal ou in ziz i koné out zanfan! ou la fé ali, ou wa ali grandi si ou rouv byin lo zyé ou wa son bezwin.

Kan banna na 18 an, ou trouv pi lasistans sosyal, lapi larzan po ginyé sé pi zot travay, arla sépa ou lé dann la mèrd pèrson i konépi azot. Mé la vi i kontinyé vik sé bann minm pèrsonn sora la po perpétyé zot koméraz, pars kan lo marmay sora adilt li wa fé zanfan, la sinn i kontinyé. Nout péi konm banna i di sé in péi na son spésifisité, kan i aranz, ésèy fé aplik in zafèr ké i koné sera in katastrof.

Angro sé format bann moun po nir konm robo, tout fason dann so péi la ou na pi lo drwa, si riyn, pétèt si ou na larzan? la mi lès azot médité si bann parol la!

Georges Soubou

Lang dé momon?

In moun i pé awar dé momon?

Dapré sak mwin la tandi, zordi nou la koz dési, mon dalaon la rakont amwin, ké sèrtin, bann travayèr po la lang swadizan, i pans ké lo rénioné na dé lang matèrnèl, lo fransé é lo kréol, awar dé trwa, kar dis ang lé normal awar in louvèrtir pli gran.

La rakon ké nou na dé lang matèrnèl la swa zot la mal formil, swa zot lé tro intélizan, la lang i may. Atouléka si sé po totos nout lang par la swit lo nafèr lé apropriyé, Si nou na dé lang, sé in pé konm bann Frèr soeur syamoi, na inn wa fatig plis lot, é kan wa voulwar séparé, na inn lo plisouvandéfwa i kine.

So trikmardaz so bann moun la trann fé , fodré pa in zour i tonm si zot gèl, pétè i sèy fé oubli anou ké nou lé rénioné avantou. Domin sora konm sèrtin moun kan i sort an frans i koné pi kosa ilé brèd sousou. Antouléka di ké nou na dé lang matèrnèl, fodré réflési inpé ladsi apréla na war.

Georges Soubou.

Kozman.

Kozman po in dalon.

Mon dalon laba koté kanada, Jules konm ou wa la kiltir Larényon, andéor lé dir po trouvé, nou isi de nout koté ni sèy mèt anplas, inndé nafèr kiltirèl si lo web é an kréol, dopi inndé zané, é mwin lé kontan de zot ankourazman. Ankor in fwa mi èskiz a mwin po sak i anvoy amwin bann tèks po tradiksyon, po sa mwin na tro travay, po linstan na pwin vréman stkritir i fé so nafèr isi ,po mwin transféré vèr zot. Inndé rodirèksyon min té fé po zot, si sèrtin zasosyasyon Larényon, mé konm ou wa banna i réponn pa, minm sak lé péyan lé dir. Bann domoun i ékri amwin mwin lé kontan, mé sanm plisouvandéfwa, in sinkantinn zimèl po réponn toulé dézour lé dir.

Epi mi anons in pé plis de souplès dann lané 2010, inndé dalon la rozwinn amwin na sèy propoz azot in pé plis zafèr si lo web.

Dopi lo mwa septanm, kréolèr i komans a mèt bann vidéo HD si youtube é lé zot platform, Antouléka mi anprofit po swé azot o ka i giny pa in bon fèt 20 désanm é bon zourdlan

Georges Soubou.

Andikap: lo réspé bann zaménazman!!

Respèk bann zandikapé!!

Mwin mi pans i fo rèspèk bann zinfrastriktir laté mi an plas po zot. Déza na pwin tro, é si néna ou trouv touzour inn gouyav po vol la plas. Dann sin-Pir biyn ké banna i di ké zot i fé bann zaménazman, lo plisouvandéfwa, lé mal aménazé, é domoun i rèspèk pa. Sékirité sosyal, kaf, zinpo, lé difisil po ariv anndan, sé pa lo batiman li minm, mé po arivé, inn déza fo ou trouv in plas po garé, apréla konm la plipar lotan lo pé lé garé si trotwar, la i poz in problinm! Loyt problinm sé ké sèrtin pèrsonn na in moun andikapé sé li, kan lo monn lé pa la sanm li , bin li ansèrv lo badg ski fé in plas lé pèrdi, kon zot i wa, domoun lé san skripil

Georges Soubou.

La rout isi!!

Alon kozé!

Lo nafèr dann nout péi ousa domoun sora, mi krwa in pé dakor sanm mwin, mé la zamé trouv solisyon, la nou sava koz desi la rout, pa la rout ankornis ousa i kout tèman larzan é la zamé trouv moyin fé in zès, anfin noré mé nana ivé pa pèrd zot kousé solèy dopi la montagn.

La nou wa koz si bann rout kominal é départemantal, i dévyin talèr pli sèr po antrotenir, ké la kornis! Pokosa? Bin pasito la fin aranzé, bin i kas, i pèrs lo trou po fé pas kanal, kouran, dolo é mi anpas, mé lo nafèr lé grav sé ké bann zantropriz la koup la rout, i romèt pi konm lélé, navé goudro, mé banna i mèt béton kan la fini zot travay. Lo problinm i spas, sé ké bann kamyon, loto kan i pas i fouy ankor pli gran lo bann kanal. E kan na la pli sé plis in katastrof.

Sépa si bann zantropriz la i travay min dann la min, ou sinon zot napi moyin po romèt konm lélé, paasé larzan ou pa asé konésans. Pandan tou so tan out loto i kas po lo profi kisa? Fodré porté plint, pa pétèt kont bann zantropriz, mé bann kontrolèr i fé pa zot travay, é konm i di dann lafèr sakinn son konpétans, si lé pa kapab fé myé vo rant zot kaz!!!

Georges Soubou.

In grin boté!!

SOUBOU-RESEAUX

Arla inn ti grin d-boté dann so monn ké lé pa souvan fasil. Eské zot i koné ké flèr la na in takon vèrti, pa ké po son boté mé, osi po son kalité médsine.

Ansèrvi po fé bann parfin, mé osi distilé bann domoun i lav la figir ansanm. Na in takon dot zafèr po si so plant. Mwin dann monn ti zardin dèyèr la kaz mi aprési son boté, na plisiyèr lodèr, sakinn son gou. I di osi dann la vi toulézour oulé bèl konm in roz. In roz pa ankor ouvèr lé plito ofèr po in fy vièrz.

Georges Soubou

Lo zour konm la nwit!

Lo zour konm la nwit!

A byin rogardé sèrtin swadizan zaktèr kiltirèl, Larényon i vé touzour fé krwa a nou la nwit po lo zour, arla sépa zordi mi giny dann mon bwat mèl, inn ti mo po sak la giny sibvansyon po sak lé imatèryèl, in takon minm plis kifo.

Bon talèr wa di mwin lé zalou akozsa zot i ansèrv larzan bann kontribialb po zot ti biznès, konm sé po in nafèr lé imatèryèl, lé sir ni wa arpa kosa i sava fé, dopi dézané bann komik la i giny bonpé larzan po fé bann trin po la kiltir, mé mwin pèrsonèlman mwin zamé vréman vi! Mi antan i di la fé mé war minm dir dir.

Bon konm lo Maloya laté rokoni, lésir sakinn i romèt azot a friyé po war si i giny pa kapar inpé. Mwin la min lir si intèrnèt ké nana na léspwar ké si NRJ i pas Maloya, mé sak zot la pa konpri ké sak radyo na son forma, di mwin NRJ i rèspèk. Po la plipar bann radyo asosyatif sé plito la konkirans antrozot, é sa sanm bann kontra lasarité, kan ou antan bann zingl lé pa anrapor san lo tinm i pas, mi domann amwin si zot i koné kosa zot trann fé.

Mwin antan ansyin animatèr la radyo, sépakoman mo sévé i drès si mon tèt, kan nou wa sèrtin koman i koz si la radyo, lé sépa fout kapab prézant in morso lamizik san kors lo titr lé dir. Sa lé pa zot fot kan i di azot mèt la kord lé pa oblizé.

Dann lo sid Larényon ou na sèrtin radyo, mi domann amwin si bann boug i travay dési lé pa fini mor sé zot lam ou lordinatèt i tourn. Dann in not kozman mi koz si pousèr bouton, in travay plis dévalorizan po in boug, prézant sak matin lo minm zafèr, konm banna i di in radyo san fil.

Lo CSA i rouv pa lozyé ladsi, okilé lo réspé bann kayé dé sarz, sak i di i fo fé, sak i fé swadizan la kiltir, okilé bann progranm kiltirèl? Sé pa pars i koz an kréol si in radyo, ké lé forséman kiltirèl, argar in kou bann radyo komèrsyal, bonpé i koz kréol, zis po giny zoditèr, zot na riyn a fout aparaman

Pwin tro lontan nou sava pas an nimérik, la nou wa sèrtin radyo, i komans di ké lé pa sir zot wa ariv ténir lé débout, tout fason po la kalité lo bann program zot i fé sora pa in pèrt. So gasi la noré pa été si zot té i atann pa boudin kwi dann vant koson. Si ou koz konm in kanar alor kan sora nimérik, sar pir, san trèman lo son ki kout asé sèr, bon na koz inpé plis pli tar la mwin trann soul azot.... Bo mi arèt pars mwin té sa koz èkzot in boug bann té sava amar ali é bèz ali kout sabouk po in trin fanm...

Georges Soubou.

La vi bakanal.

La vi bakanal ( la vi an ba kanal po tourn sak, mové vi ).

Dann tan lontan té i di té ti fann arèt minn la vi bakanal, arèt fé lo mové vi! La vi bakanal lé pa sinplman po in fanm, mé i adrès osi a tout domoun i aminn mové vi, boug la i aminn la vi bakanal, in zour la lwa wa trap ali. Fanm la i aminn lavi bakanal, li okip pi son marmay, ni son fwayé, son vi lé pa sa.

Aforské li oubli son vré vi li wa tonm dann la vi bakanal, boug la na 40 an li wé war son démon minwit la li é an bakanal.

www.soubou.fr Georges Soubou.

Kozman vérité.

Kozman vérité!!!

Kan in moun i di in kozman vérité, normalman sé po dir sak lé vré! Kozman vérité i sort dann labous bann marmay, bann ti baba, mé rarman dann la bous granmoun. Pokosa? Sa sa la touzour été, afors tro ramas mantèr, sèrtin zadilt na pi zot krédibilité, opré sèrtin moun. Kosa i fé ké plisouvandéfwa, domoun i krwa pi?

Nout koko laté sitèlman basiné sanm nafèr mantèr, lé normal napi konfyans, kiswa bann zantroptriz, bann boug politik dann gouvèrnman, i taz touzour la gèl domoun, zot lé mantèr sé po sa osi domoun i dout é i krwa pa. Ramas mantèr domoun sé in lar, domoun si sava gran lékol po konèt ramas lo bon mantèr. Taz in maksimome, avan té pas la min dann la tèt bann marmay po kouyonn domoun, koméla bann spésyalist i travay dési lo koman fé po totosé.

Kozman vérité sa lé dir po ankésé di in moun son kat vérité lé sir wa fémal alé, mé kon la plipar lotan la pwin la ont kosa ou vé fé.

Georges Soubou.

Disaknapodi.

Disaknapodi,

Té dann nout péi i fé bon viv, mé sak lé vréman rogrétan sé tousa la salté domoun i zét, partou san réflési, sépakoman. Swa domoun lé makot an nésan ou i dévyin konmsa, antouléka, dann sominn-si minm, alé parkoman in boug garé si in parking in gran sirfas, fine sanz son marmay, olyé mét lo kous dann in sak é mèt dann la poubèl, li balans sa zis dann lo bor ranpar koté li lé garé.

Kosa ou vé fé sanm boug konmsa, si na pwin réspé dann somin é po la natir, mi poz amwin lo kèstyon son kaz èské li fé konmsa, li zèt dann son kour kwé? Antouléka lé pa sir li wa lir so mézaz, mé si zamé li tonm in zour dési. Fodré li sanz son mantalité. Si inn ti bout latèr konmsala nana domoun i rèspèk pa, koman nafé po lavnir. Mwin la di ali sak li fé lé pa byin, mé a di a mwin pa mwin i nétway, mwin la répon, rèzman sé pa mwin pars mwin noré fé manz ali son salté. Sé pa la ont la pran ali, mwin la vi li la désann de son kat kat, li la glisé dann lo bordaz, mi èspèr lété po ramas son zafèr li la zété.

George SOUBOU.

Monkozé, mon kozman!

Mon kozé sé la mayèr di sak i sopas dann nout péi. Atèrla lé pa politik, parské kréolèr i pans ké la politik sé in nafèr lé pa bon po mèt dann tout sort kalité la min. Koméla na boug sèrtin sak i fé la politik, mi pans ké zot lé pa pré po prann in langazman, po nout péi é minm po in parti divèr!

Pokosa? Kan ou wa dann nout péi sak i taz la gèl domoun sann in fo program politik, po giny inn ti plas sépa ousa, po favoriz zot bann magouy ké zot la mi anplas.

Tout fason lé sir wa tiliz touzour rényoné po zot ti magouy.

Georges Soubou.

Pousèr bouton!

Kontra lasistana.

Sa in nafèr la énèrv amwin si lo kou, mé kan mi réflési, sé pa in nafèr i risk sanzé sirtou dann sèrtin stasyon radyo. Sanm in kontra lamizèr, ké lo konsèy zénéral i donn, atann pa ké lo boug lé anbosé po fé lanimasyon dann la plipar lo loka, lo boug ou lo fann na okin baz dann lanimasyon. Lé zis la po fé lota pousbouton, 1 an ou dézan, lo boug i répèt lo min fraz, i prézant kaziman lo minn sanson, ziska in rabèsman lo pli total.I fé riyn domoun dèryèr lo pos i moukat, li lé pa la po war.

So bann kontra lasistana la i èkzis é wa ékzisté, pars po linstan kaziman okin lasosyasyon i pé anbos a kontra indétèrminé é sa par mank larzan. Malgré bann sibvansyon, lé la po lo fonksyonman, bann fré lésans, sanm bann ti fèt organizé po bann dalon. Po sa okin zinstitisyon i rouv lo zyé, i antann ziska in zour na rodrèsman zidisyèr.

Konm mwin la dia zot tèrla, lo boug la koz sanm mwin po son sitiasyon, mékosa li vé mi fé, a park ékout ali, lo patron i taz ali si lo ronouvèlman son kontra, i fé mové manyèr sanm li. Mwin la près anvi diali ké li té koné koman té lo zafèr astèr démèrd ali. Bon oubli pa ké vann zafèr ou la kopyé si lordinatèr, bann dokiman konm baz doné , ransèyman konfidansyèl konsèrnan laso lé intèrdi, banna wa fé giny aou kriz kardiak konm ou koné, si la sasèm la trap aou po vann bann CD kopyé ou risk avwar gro zanwi. Antouléka out kontra la prèské fini viv an fèr é konm banna i di que la paix du seigneur soit toujours avec toi amen. (pzv)

Georges Soubou.

Lang kréol rénioné!

Lang rénioné la!

Lang rénioné la lé konm lo Maloya, avan té intèrdi koméla lé rokoni, konm in litilité. Mé na ankor domoun lé kont so nafèr la pokosa? Si nou gard byin sé bann moun i tiliz plisouvandéfwa la lang sanm lamizik po zot profi, politik sinon po fé rant larzan, kan i raport azot, i bouz pa. Mé lo problinm sé ké si zot té ékri azot fason la pétèt té noré té dakor, mé wala! zot bann ti kamarad la pas dovan zot la prann lo nafèr po zot. Astèr i batay po in K ou in C, bon! mwin mi lès azot dann zot caca, é mi tiliz mon K. Sak la pa kontan oubli pa ké na dot sit kolonyalis i itiliz dot maynèr ékri. Nout lang sé po lisntan in lang na pwin vréman in grafi, asé pousé, po linstan lé plito fonolozik. anfin na domoun i travay si in not manèyr ékri, mi pé ankouraz azot.

Ofèt ousa ilé bann média i zafèr po la lang rénioné? Antouléka nana konm i di lo bann zingl mé bann zaksyon mwin pokor vi.


In verb i dévré fé son laparisyon biynto lo vèrb pousbouton. Mi pousbouton, li pous bouton, li wa pousbouton. Sa sé in nafèr in boug ra rakont a mwin son travay posa nou wa koz prosinnman si so pozé bouton!

Georges Soubou.

Lo ti bout dann kor i fé mal : la LANG domoun.

Kozman Larényon
La lang na pwin lo zo! La lang i bat konm la ké lo syin!

Kosa i vé dir? La lan na pwin lozo sé kan in moun i koz po ryin dir, Li yinm fé koméraz son lang i yinm baté.

La lang dann lo kor imin na in gran linportans, kiswa dann ninportakèl péi, dann ninportakèk sitiasyon. So ti bout la dann nout kor na in gran pouvwar, fé lo byin konm lo mal, li pé fé kondane, in moun po in fot li la fé, ou fé ansort kin koupabl i ansort ali. La lang i pé blès in moun pliskin kouto, ou in koud fizi. Epila lo nafèr isi li ansèrv lo plisouvandéfwa sé po fé kok out kamarad, mé rarman po fé in bonzafèr.

Georges Soubou réseaux soubou.fr kanal savoir.

Obésité le danger. In dokiman an kréol rénioné.

Lo danzé!

Bann grès lé danzéré lé o nivo lo bad-rin dann lo sintir, grès viséral abdominal, na in rolasyon dirèk ké so bann grès, lé la sé osi ké diabèt lé dann kwin la.

Lipèrtansyon artéryèl é in to triglisérid, tro o. Na insèl moyin po mézir so bann grès, posa prann in mètr soupl si otour la tay in boug i dépas in mètr, ou

katrvinkinz pou in fanm. Pour ski konsèrn lo diabèt in moun lé obèz na trwa fwa plis de risk, kin obèz normal. Pars plis la kantité la grès dann lo kor lé gran,

plis lo kor la bézwin linsiline. Si out pankréa, na difikilté po fabrik linsiline, la lé sir ké lo diabèt i trap aou. Plis in tyèr domoun na lo diabèt.

Georges Soubou
KANAL SAVOIR Île de la Réunion.

E koson inporté alor?

E koson inporté alor?

La na koz si in zanimo domoun i yinm byin, po linstan na riyn a dir si lélévaz Larényon, domin i riskab kozé! Kan banna i kri sanm maladi, dann zélévaz laba si koté lo Meksik i fo pa oubliyé ké bann gro zinportatèr kapitalis, sak i fé la sarkitri, na in gro par dann so bann zélévaz, ké lé pa o norn, la di moman i fé rant larzan pèrsonn i koz pa, lo zyé lé bousé. An gro po di azot ké nout kalité la bouf i zwé in rol inportan si nout santé. Lir la swit si soubou.fr rubrik santé.

Georges Soubou.

Dipavali fête de la lumière Saint Pierre Réunion.

Dipavali Saint Pierre.

Konm sak lané la komine sanm inndé zasosyasyon , i fé la fèt la limyèr. E konm sak ané, la longèr lo trazé i diminyé, rèzman dann so nafèrla sèrtin préstatèr i montr zot sawarfér. So lané lo Dipavali si sin-Pir lété si in kourt distans parla 500 a 600 mètr. Espéron si lané prosinn i fé i ardiminra pa plis, riskab banna i fé sa an virtièl, sanm bann zologram. Po sa fodré kontak bann sinwa banna lé gabyé ladan.

Georges Soubou - pliz zinfo si soubou.fr.